Rightwellton xəbər verir ki, Azərbaycan Respublikası Nazirlər Kabineti “e-bildiriş”in tərtibi, tətbiqi və uçotu qaydalarının, o cümlədən “e-bildiriş”in tətbiqi ilə bağlı dövlət rüsumu üzrə mədaxil qəbzinin formasının təsdiq edilməsi haqqında" Qərar qəbul edib. 

Müvafiq qərar "Dövlət rüsumu haqqında" Azərbaycan Respublikası Qanununa 29 dekabr 2024-cü il tarixində edilmiş mühüm dəyişikliklərin dövlət qurumlarının praktikasında tətbiqini mümkün qıldı. Belə ki, bundan sonra dövlət rüsumlarının ödənişi və uçotu Maliyyə Nazirliyinin “Dövlət rüsumlarının elektron idarə edilməsi (e-rüsum)” informasiya sistemi” vasitəsilə “Elektron imza və elektron sənəd haqqında” Azərbaycan Respublikası Qanununun tələblərinə uyğun olaraq "e-bildiriş" üzərindən həyata keçiriləcək. "e-bildiriş" sistemi dövlət rüsumu üzrə hesablamaların real vaxt rejimində aidiyyəti orqan tərəfindən əldə edilməsini, habelə artıq ödənilmiş və ya düzgün tutulmamış rüsumlarla bağlı müraciətlərin sistem üzərindən qəbul olunmasını təmin edəcək.

Rightwellton xəbər verir ki, Azərbaycan Respublikasının Prezidenti 12 mart 2025-ci il tarixində “Hava daşımaları üzrə rəsmiyyətin sadələşdirilməsinə dair Dövlət Proqramı”nın təsdiq edilməsi haqqında Sərəncam imzalayıb.

Yeni Dövlət Proqramı hava daşımaları üzrə rəsmiyyətin sadələşdirilməsi hava gəmisinin, hava gəmisi heyətinin, sərnişinlərin, yükün, baqajın, poçt daşımalarının hərəkətinin asanlaşdırılması, gecikmələrin qarşısının alınması, hava əlaqələrinin sürətləndirilməsi məqsədilə prosedurların sadələşdirilməsi üzrə kompleks tədbirləri nəzərdə tutur. 

Dövlət Proqramının önəmini anlamaq üçün nəzərinizə çatdırırıq ki, Azərbaycan Respublikasında hazırda beynəlxalq hava limanı statusuna malik aşağıdakı 8 mülki hava limanı fəaliyyət göstərir ki, bu hava limanlarından dünyanın 37 ölkəsinin 107 hava limanına uçuşlar təşkil edilir. Bu baxımdan rəsmiyyətin sadələşdirilməsinə dair Dövlət Proqramı Azərbaycan Respublikası milli qanunvericiliyinin beynəlxalq standartlara və tövsiyə olunan təcrübəyə uyğunlaşdırılması və təkmilləşdirilməsi üçün əvəzsiz hüquqi alətdir. 

Rightwellton xəbər verir ki, Azərbaycan Respublikası Prezidenti 07 aprel 2025-ci il tarixində "İdxalı əlavə dəyər vergisindən azad edilən xammal və materialların siyahısı"nı 107 və 108-ci bəndlər əlavə edilərək genişləndirilməsini ehtiva edən Fərman imzalayıb. 

Nəzərinizə çatdırırıq ki, elektrik mühərriki ilə işləyən avtomobillər üçün ikinci və üçüncü səviyyə elektrik enerjisi doldurucularının yaddaşlı proqramlaşdırılan və proqramlaşdırılmayan kontrollerinin idxalı əlavə dəyər vergisindən azad edilmişdir. Bu və bu kimi addımlar yaşıl enerjiyə keçidi mümkün qılan texnoloji avadanlıqların ehtiyat hissələrinə maddi əlçatanlığı təmin etmək niyyəti güdür.