Prezident İlham Əliyevin “Rəqəmsal ekologiya” informasiya sisteminin yaradılması və bununla əlaqədar bir sıra məsələlərin tənzimlənməsi haqqında” və “Milli Məkan Məlumatları” informasiya sistemi haqqında Əsasnamə”nin təsdiqi və bununla əlaqədar bəzi məsələlərin tənzimlənməsi barədə" 10 yanvar 2025-ci il tarixli Fərmanları ilə rəqəmsal idarəçilik istiqamətində uğurlu addımlar atıldı.

Artıq vətəndaşlarımız REİS vasitəsilə Azərbaycan Respublikası Ekologiya və Təbii Sərvətlər Nazirliyinə (Nazirlik) və tabeliyindəki qurumlara, habelə publik hüquqi şəxslərə elektron kabinetləri üzərindən müraciətlərini göndərmək, elektron xidmətlərdən istifadə etmək və ödənişləri həyata keçirmək imkanına sahib olacaqlar. REİS-in sahibi funksiyalarını Nazirlik, operatoru funksiyalarını isə Nazirliyin tabeliyindəki “Geodeziya və Kartoqrafiya Agentliyi” publik hüquqi şəxs həyata keçirir.

Azərbaycan Respublikası ərazisində müəyyən məkan, ərazi və coğrafi bölgə ilə birbaşa və ya dolayısı ilə əlaqəli olan istənilən məlumat milli məkan məlumatı hesab edilir. MMM informasiya sistemi vətəndaşlarımızın milli məkan məlumatları üzrə xidmətlərə əlçatanlığını artırmaqla real vaxt rejimində, keyfiyyətli və operativ xidmət almasına imkan verəcək. MMM-in sahibi və operatoru Azərbaycan Respublikasının İqtisadiyyat Nazirliyidir.

REİS, MMM və bu kimi informasiya sistemlərinin yaradılması və Elektron Hökumət İnformasiya Sisteminə (bundan sonra – EHİS) inteqrasiyası vətəndaşlarımız üçün əlverişli inzibati aktın qəbul edilməsi və ya onlara məxsus olan hər hansı hüququn həyata keçirilməsi ilə bağlı, həmçinin vaxta qənaət baxımından olduqca əhəmiyyətlidir. Nümunə üçün baxaq, vətəndaş A mülkiyyət hüquqlarını həyata keçirmək  üçün ərizə ilə inzibati orqana müraciət edir. İnzibati orqan da öz növbəsində sübut qismində ərizəyə əlavə edilməli olan sənədləri və ya məlumatları A-dan tələb edir. İnzibati orqan A ilə bağlı məlumatları EHİS vasitəsilə müvafiq dövlət orqanından (qurumundan) əldə edə bildikdə A-dan həmin sənədlər və ya məlumatları daha tələb edə bilmir və nəticədə rəqəmsal imkanlar inzibati icraatı A şəxsinin timsalında bütün vətəndaşlarımızın xeyrinə sadələşdirmiş olur.

Azərbaycanda yerli bazar iştirakçılarına 36-dan çox hüquqi xidmətlər təklif edən Rightwellton şirkəti yenilənmiş saytını təqdim etdi.

Şirkətin direktoru Fərid Həsənovun sözlərinə görə yenilənmiş sayt həm fiziki şəxslərə, həm də şirkətlərə yönəlik formada hazırlanmışdır.

“Əvvəlki ilə müqayisədə yeni istifadəyə verilmiş veb sayt şirkətin cari fəaliyyətini və fəlsəfəsini daha çox özündə əks etdirir. Saytımızı yeniləməkdə əsas məqsəd yerli bazarda fəaliyyət göstərən şirkətlərə xidmətlərimizi sadələşdirilmiş formada təqdim etməkdir. Azərbaycanda hüquq sahəsi üzrə xidmət göstərən şirkətlərin saytlarında kontent qəliz dildədir. Bu da öz növbəsində xidmətlərdən faydalanmaq istəyən şirkət və sadə vətəndaşlar üçün bir çox çətinliklər yaradır. Bu qopuqluğu aradan qaldırmaq və şirkətlərə təqdim etdiyimiz xidmətləri anlaşılan dildə təqdim etmək üçün həm məlumatları, həm də saytın interfeysini yeniləmək qərarına gəldik. İstəyimiz hər bir kəsin kənardan dəstək almadan saytımıza daxil olaraq sadə dildə izah olunmuş xidmətlərlə tanış olub, ona lazım olan xidmətlə bağlı sorğu göndərməsini təmin etməkdir. Biz bu yolda peşəkarlarla addımlayırıq. Sayt bu işin birinci mərhələsi idi. Növbəti mərhələ saytın daha zəngin kontentlə təmin olunması və yeni xidmətlər üzərində çalışmaq olacaqdır.”

Qeyd edək ki, şirkət bu yaxınlarda yeni korporativ dəst-xəttini də istifadəyə vermişdir. Hal-hazırda şirkət daha geniş marketinq addımları atmaq üçün bir neçə marketinq şirkətləri ilə danışıqlarını davam etdirir.

Rightwellton xəbər verir ki, Azərbaycan Respublikası Nazirlər Kabineti “e-bildiriş”in tərtibi, tətbiqi və uçotu qaydalarının, o cümlədən “e-bildiriş”in tətbiqi ilə bağlı dövlət rüsumu üzrə mədaxil qəbzinin formasının təsdiq edilməsi haqqında" Qərar qəbul edib. 

Müvafiq qərar "Dövlət rüsumu haqqında" Azərbaycan Respublikası Qanununa 29 dekabr 2024-cü il tarixində edilmiş mühüm dəyişikliklərin dövlət qurumlarının praktikasında tətbiqini mümkün qıldı. Belə ki, bundan sonra dövlət rüsumlarının ödənişi və uçotu Maliyyə Nazirliyinin “Dövlət rüsumlarının elektron idarə edilməsi (e-rüsum)” informasiya sistemi” vasitəsilə “Elektron imza və elektron sənəd haqqında” Azərbaycan Respublikası Qanununun tələblərinə uyğun olaraq "e-bildiriş" üzərindən həyata keçiriləcək. "e-bildiriş" sistemi dövlət rüsumu üzrə hesablamaların real vaxt rejimində aidiyyəti orqan tərəfindən əldə edilməsini, habelə artıq ödənilmiş və ya düzgün tutulmamış rüsumlarla bağlı müraciətlərin sistem üzərindən qəbul olunmasını təmin edəcək.