“Arbitraj haqqında” Azərbaycan Respublikasının 2023-cü il 26 dekabr tarixli 1077-VIQ nömrəli Qanununun icrası ilə əlaqədar Azərbaycan Respublikasının bəzi qanunlarında dəyişiklik edilməsi barədə AR Qanunu 7 yanvar 2025-ci il tarixindən qüvvəyə mindi.

Dəyişikliklərə əsasən, xarici və yerli arbitraj məhkəmələrinin qərarları əsasında verilən icra vərəqələrinin icraya yönəldilmə müddəti 3 ildən 1 aya endirildi. Əlavə olaraq, yeni qaydalarla arbitraj məhkəmələrinin müvəqqəti təminat tədbirlərinin tətbiqi barədə qərarlarının tanınması və icrası barədə məhkəmə qərarları əsasında verilən icra vərəqələri dərhal icraya yönləndiriləcəkdir.

Həmçinin islahatların davamı olaraq, qanunun icrası ilə əlaqədar “Dövlət rüsumu haqqında” AR Qanununa dəyişikliklər edilməklə arbitrajla əlaqədar ərizələrə görə dövlət rüsumları müəyyənləşdirilib:

Xarici arbitraj məhkəmələrinin qərarlarının tanınması və icrası ilə bağlı ərizənin verilməsinə görə, arbitraja münasibətdə yardım funksiyalarının yerinə yetirilməsi ilə bağlı ərizənin verilməsinə görə, habelə arbitraj məhkəmələrinin qərarlarının ləğv edilməsi ilə bağlı ərizənin verilməsinə görə hər biri ayrı-ayrılıqda 100 manat, yerli arbitraj məhkəmələrinin qərarlarının məcburi icrasının təmin edilməsi ilə bağlı ərizənin verilməsinə görə 50 manat və nəhayət müvəqqəti təminat tədbirlərinin tətbiqi barədə arbitraj məhkəmələrinin qərarlarının tanınması və icrası ilə bağlı ərizənin verilməsinə görə 50 manat dövlət rüsumu ödəniləcək.

Hüquq sahəsində insan kapitalına və texnologiyaya sərmayələri ilə seçilən Rightwellton şirkəti yeni korporativ dəst-xəttini təqdim etdi. Şirkətin yeni korporativ dəsti-xətti İngiltərədə yerləşən yerli marketinq şirkəti tərəfindən hazırlanmışdır.

Rightwellton hüquq şirkətinin direktoru Fərid Həsənov yeni loqonun onların fəlsəfəsini tamamladığını söylədi.

“Biz bu prosesin uzun və yorucu olacağını düşündüyümüz halda əməkdaşlıq etdiyimiz şirkət verdiyimiz tapşırığın öhdəsindən ilk dəfədən gəlməyi bacardı. Rebrendinq işləri başa çatdıqdan sonra Rightwellton şirkəti şirkətinin yeni veb-saytı üzrə işlərə başlamağı planlaşdırırıq. İnanırıq ki, əməkdaşlıq etdiyimiz şirkət bu istiqamətdə də nəzərdə tutduqlarımızı doğru şəkildə həyata keçirəcəkdir. Bizim üçün bu yeniliklər xarici bazardakı əməkdaşlıqlarımızı inkişaf etdirmək və yerli bazar iştirakçılarına beynəlxalq səviyyədə xidmət göstərmək üçün vacibdir. Yeni korporativ dəst-xəttimiz mərhələli şəkildə şirkətin digər kommunikasiya vasitələrinə də tətbiq olunacaqdır.”

Qeyd edək ki, Rightwellton hüquq şirkətinin kommersiya adıdır. Şirkətin yerli bazardakı hüquqi adı Baku Global Consulting MMC-dir. Şirkət hal-hazırda yerli və xarici bazarda payını artırmaq üçün strateji əməkdaşlıq üzrə danışıqlar aparır.

 Rightwellton Hüquq Şirkəti olaraq, ADA LAW Society tərəfindən keçirilən "Amerika Parlamentar Debatı" turnirinin qaliblərinin mükafatlandırma mərasimində iştirak etməkdən böyük qürur duyuruq. Bu prestijli layihənin bir hissəsi olmaqla, debat mədəniyyətinin inkişafına və gələcəyin liderlərinin yetişdirilməsinə dəstək vermək bizim üçün xüsusi əhəmiyyət kəsb edir. Qaliblər üçün təqdim etdiyimiz fürsətlər: 

• 3 aylıq ödənişli təcrübə proqramı ilə onları peşəkar inkişaf yolunda dəstəklədik.
• Qalibləri dəyərli hədiyyələrlə mükafatlandıraraq zəhmətlərinin qarşılığını verdik.            

Rightwellton olaraq, gənclərimizin bilik və bacarıqlarını inkişaf etdirmək, onların uğurlu gələcəyinə töhfə vermək üçün bu kimi layihələrə dəstək olmağa davam edəcəyik.